حمد وأحمد: والدنا هجرنا ونعتاش على غسيل العربات والأورنيش!

إعداد: حسن الجزولي

في ظروف الحرب  والعوز والحاجة، تضطر الأسر الفقيرة لدفع أبنائها لأسواق العمل الهامشية لتوفير فاتورة المعيشة، وحاجيات الأسرة، التقيت الميدان بصبيين أشقاء يساهمان بعد ساعات المدرسة في إعاشة والدتهما بالعمل في غسيل العربات والأورنيش.

+ أنا حمد وده أحمد، أنحنا أخوان.

* منو الكبيرفيكم؟

+ أنا الكبير عمري  وأحمد الصغير

* إنتو من وين يا حمد؟.

+ من قرية أم قرفة شمال كردفان.

* طيب ولدوكم وين؟.

+ أنا إتولدت في القرية، بس أحمد إتولد هنا في أم درمان.؟

* وجيتو متين للخرطوم؟

+ بعد الحرب في مناطقنا!.

* ولسع الحرب موجودة؟

+ موجودة بس مافي منطقتنا، في مناطق قريبة مننا، زي أبسمرقع، ناس كتار هربوا من هناك وجونا في القرية.

* ما قاعدين تمشو المدرسة؟

+ بنمشي بس بعد المدرسة بنشتغل هنا، أنا في غسيل العربات وأحمد في الأورنيش.

* إنتو في ياتو سنة دراسية؟

+ أنا في سابعة واحمد في سادسة.

*  أبوكم شغال شنو؟

+ أبونا فات خلانا من زمان؟

* مشى وين؟

+ أمي قالت في السعودية

* ما برسل ليكم مصاريف؟

+ ما برسل، أخوي ده زاتو ما شافو كلو كلو.

* إنت شفتو؟

+ شفتو بس كنت صغير

* أمكم شغالة؟

+ بتشتغل في البيوت.

* بتكسبو كم في اليوم؟

+ ما كتير عشرين خمسة وعشرين جنيه.

* بتعملو بيهم شنو؟
+ بنديهم لأمي!.

* ساكنين وين؟

+ في دار السلام.
*  بترجعو بيوتكم متين؟
+ زي حداشر إتناشر بالليل.

*طيب بتزاكرو متين؟.

+............!.