كيف نبني نقابة عمالية ؟

اعداد :محمد سيف

قبل الأجابة علي السؤال الأول نحن بصراحة محتاجين لمساعدة أي زولة وزول عشان رسالتنا دي تصل جماهير العاملات والعمال لأنو في واحدين/ت ما عندهم حتى موبايل ولا بعرفو يقروا رجاء ترجموه لكل لغات شعوب السودان وكل واحد/ة داير يساعد يرفع أيدو بالله .

١/ ليه النقابة مهمة ؟! .

طيب قبل ما نشرح أهمية النقابه كدي النبدأ بالقول أنو النقابة لازم تجسد العمل الجماعي المنظم للعمال ، أها كيف الكلام ده ؟! يعني لو في 100 عاملة في مصنع صابون وهن متفقات تب وعندهن مشاكل دائرات تتحل طبعاً ما ممكن ال100 عاملة يخشن كلهن مكتب المدير ويُعقدن يجوطن معاهو المفروض يقومن يختارن عشر عاملات يمشن يتكلمن بالنيابة عنهن ، أها العشرة ديل جسدت أحتجاج المئة عاملة وما كان ممكن يتم أختيارهن لو ما المئة عاملة كانن متوحدات ومنظمات.

نرجع لي أهمية النقابة وبنقول أنو النقابة تنظيم قديم حنتكلم عن التاريخ في كتابة تانية خلونا نركز هنا على أهمية النقابة عشان كده حنشرح أنو العمل النقابي لازم يكون ممارسة يومية في موقع العمل مصنع كان أو شركة أو ورشة أو غيرها من أجل التعرف على المشاكل والمطالب العمالية والنشاط بتم وفق برنامج قررتو الجمعية العمومية للنقابة محدد ‏عشان النقابة تلقى حلول للمشاكل وتلبي مطالب العاملات والعمال المختلفة وطبعاً نحن هنا بنتكلم عن العمل النقابي الصحيح البتقوم بيهو نقابة صاح ونحن الأخترناها مش جات بسياسة اللولة والأمر الواقع .

طيب النقابة الصاح مهمة عشان مفروض تعمل للعاملات والعمال الأتي :-

أولاً :- لأنها حتسعى دون تأخير عشان تكون مواهي وأجور ورواتب العاملات والعمال عادلة ومتناسبة مع :

 ١/ تكاليف المعيشة اليومية من أكل وشراب ومصاريف مدارس وجامعات وموصلات وأيجار البيت (السكن) والهدوم (اللبس) بالأضافة للخدمات الأجتماعية المختلفة زي التعليم والصحة والعلاج والدواء والتنقل يعني زمان كان في تراخيص القطر للناس البكونوا شغالين بعيد من أهلهم ودايرين يسافروا ليهم في الأجازات وحتى مفروض الماهية تغطي الترفيه مش نحن العاملات والعمال ديل بشر وعندنا كرامة وما حقنا نرفه علي أنفسنا ولمن نقول الكلام ده ما قاعدين نبالغ ولا حاجة لأنو من أوجب واجبات الدولة السودانية أنها تكون عادلة في توزيع الدخل القومي (وهو عائدات صادراتنا ومنتجاتنا ودهبنا وبترولنا ....الخ) وتصرف منو علي الخدمات وتخلي العلاج والتعليم وغيره من خدمات مجان وبي كده بتساهم دولتنا في رفع المعاناة حقيقة عن ضهور العاملات والعمال المهدودة . 

٢/ تحقق التعويضات المختلفة زي أصابة العمل والأمراض المهنية والفصل التعسفي والما قانوني والتحرش البتم علي العاملات وحادث الحركة البحصل للعمال والعاملات في طريقهم من وإلى مكان العمل .....الخ التعويضات وده مع رفع مستواها ورفع قيمة القروش .

٣/ توفير الخدمات الإجتماعية للعمال والعاملات و أسرهم من دور حضانة ورياض أطفال والمساعدة القانونية عند أحتياجهم لها ودعمهم في حالات الكوارث والوفيات وغيرها .

٤/ ضمان حصول العمال والعاملات على ‏تقاعد مناسب ومكافآت ما بعد الخدمة عادلة مجزية وبطاقة متقاعد تعفيه وتخفض له دفع رسوم وتذاكر خدمات بعينها وفاءاً لما قدموه من أجل البلد .

٥/ توفير التأمين على الأخطار المختلفة الممكن يعاني منها العمال والعاملات كان أصابات في مكان العمل أو في الطريق منو وأليهو أو الأمراض المهنية أو أغلاق المصنع أو أفلاسه أو حدوث كارثة طبيعية أو غير طبيعية زي ضربة مصنع الشفاء .‏

طبعاً قطعاً في حاجات ممكنة تكون سقطت هنا فبالله همتكم معانا عشان تضيفوها وكده بنكون كُلنا بنخدم للوعي .

#حملة بناء نقابة العاملات والعمال_الحرفيين

 تابعنا على

للاشتراك في وتس اب أخبار الحركة الجماهيرية احفظ الرقم 00249122970890 وأرسل عليه جملة ( اشتراك ب الوتس اب ).